Рөстәм Миңнеханов Мөслим районы кырларын вертолеттан карады
Татарстан Рәисе Рөстәм Миңнеханов республика районнарында эш сәфәрендә булды. Иртән ул Татарстан Авыл хуҗалыгы һәм азык-төлек министрлыгы башлыгы Марат Җәббаров белән Мөслим районы кырлары өстеннән вертолетта очып узды. Бу хакта Татарстан җитәкчесенең матбугат хезмәте хәбәр итә.
Муниципалитетның авыл хуҗалыгы җирләре мәйданы 100,8 мең га тәшкил итә, барлык мәйданның 82 процентында чәчү төгәлләнгән.
Район башлыгы Альберт Хуҗин сүзләренчә, муниципалитет республиканың 27 программасында катнаша.
Әмма нәтиҗәлелек рейтингы югары булуга карамастан, Мөслим районында игътибар таләп итә торган мәсьәләләр бар, алар - шәхси ярдәмче хуҗалыкларның, терлекләрнең баш саны кимү, диде Җәббаров.
Рөстәм Миңнеханов район җитәкчелегенә халык белән эшне көчәйтергә кирәклеген әйтте.