Казанда велосипедлар җыю буенча хәйрия акциясе уза
Казанда велосипедлар җыю буенча хәйрия акциясе уза. Аларны авыр тормыш хәленә эләккән гаиләләрдәге балаларга тапшырачаклар.
Шәһәрлеләр файдаланылмый торган транспортны 22 майга кадәр тапшыра ала. Велосипедларны Декабристлар урамы, 103 (эш көннәрендә 11:00 сәгатьтән 20:00 сәгатькә кадәр, ял көннәрендә 11:00 сәгатьтән 18:00 сәгатькә кадәр) һәм Җиңү проспекты, 138а (9:00 сәгатьтән 20:00 сәгатькә кадәр) адреслары буенча кабул итәләр.
Кирәк булса велосипедларны ремонтлаячаклар, моның өчен оештыручылар акча җыюны игълан итәчәк. 23 нче майдан башлап KazVel төркемендә иганә ясарга мөмкин булачак, дип хәбәр итә оештыручылар.
Велосипедларны балаларга «Ак чәчәкләр» бульварында эшләячәк балалар барахолкасында тапшырачаклар. Чара турында анонсны соңрак Казанның парклар һәм скверлар дирекциясе бастыра.