Габделбәр Ризванов: Бик талантлы журналистлар хәмер аркасында китеп барды
«Ватаным Татарстан» газетасы журналисты, республиканың танылган шәхесләре турында язган 60лап китап авторы Габделбәр Ризванов талантлы журналистларның хәмер аркасында вафат булуларын әйтте.
«Ул заманда хәмер белән мавыгу күп иде. Редакциягә дә кунаклар килеп-китеп тора, колхоз рәисләре дә журналистларны да «сыйларга» атлыгып тора. Мин ул мәсьәләгә бөтенләй якын килмәдем, хәмергә һәвәслегем булмады. Журналистика өлкәсендә озак эшләвемдә шул да роль уйнагандыр, дим. Безнең заманда, ни кызганыч, бик талантлы журналистлар хәмер аркасында китеп барды», - диде ул «Татар журналисты» сәхифәсендә «Татар-информ»га биргән әңгәмәсендә.
Аның әйтүенчә, элек кешегә игътибар, аңа үсәр өчен омтылыш булган. «Ел саен йә 1, йә 2 бүлмәле фатир бирә иделәр, миңа да эләкте. Эшли башлаганнан соң 3 ай узгач, Казан үзәгеннән бөтен шартлары булган 14 квадрат метрлы бүлмә бирделәр. Мин эшли башлаганда, «Социалистик Татарстан»ның тиражы 300 меңгә якын иде. Матбугат – дүртенче хакимият, дигән сүз юктан гына түгел. Районга кайткач та, беренче секретарь эш урынында булса, шунда ук кабул итә иде», - дип искә алды ул.