Казан поликлиникасында каравылчыга аткан кешене тоткарлаганнар
Казанда хокук саклау органнары хезмәткәрләре Гладилов урамындагы поликлиникада атыштан соң ир-атны тоткарлаган.
«Татар-информ»га билгеле булганча, ир-атлар икәү булган. Аларның берсе поликлиникага кергән һәм каравылчыга аткан. Ә икенчесе якынча мәгълүмат буенча, машинада көтеп торган, ул бу хәлне ачыклау өчен полициягә китерелгән.
Татарстан буенча Эчке эшләр министрлыгы матбугат хезмәтендә хәбәр итүләренчә, полиция хезмәткәрләре атучы ир-атны кыска вакыт эчендә ачыклаган. Кайнар эзләр буенча җинаятьчеләрне эзләү оперативниклары һәм ГАИ хезмәткәрләре шикләнелгән ир-атны тоткарлаган. Ул Татарстанда яшәүче 50 яшьлек ир-ат, элек шәхескә каршы җинаятьләр өчен берничә тапкыр хөкем ителгән.
Хәзерге вакытта хокук саклаучылар шикләнелүченең өендә тентү үткәрә. Әлеге факт буенча үтерү нияте белән һөҗүм итү турында җинаять эше кузгатылган.
«Татар-информ» га Татарстан прокурорының өлкән ярдәмчесе Руслан Галиев хәбәр иткәнчә, прокуратура Казан поликлиникасында атыш турындагы эшне тикшерүне аерым контрольгә алган.
Элегрәк «Татар-информ» хәбәр иткәнчә, иртәнге сәгать дүрттә чит кеше медучреждение бинасына үтеп кергән. Аны 67 яшьлек сакчы күргәч, ул аңа әлегә ачыкланмаган коралдан аткан һәм кулын яралаган, ә аннары качкан.