Мөхәммәтшин: Татарстанның иң мөһим бурычларыннан берсе - авыл тормышын саклап калу
Хәзерге вакытта авыл хуҗалыгы икътисадның төп тармакларының берсенә әверелә. Шуңа күрә илнең һәм төбәкнең иң мөһим бурычларыннан берсе - авыл тормышын саклап калу. Бу хакта Татарстан Дәүләт Советы Рәисе Фәрит Мөхәммәтшин Биектау районындагы зона семинар-киңәшмәсендә белдерде.
«Төп бурыч - өч федераль программа буенча авыл халкына һәм җирле эшмәкәрләргә ярдәм итү. Безнең алда районнар белән тагын берничә очрашу тора, һәм авыл тормышын саклап калу безнең мәнфәгатьләрдә. Санкцияләр белән көрәшәбез һәм күп векторлы сәнәгатьне үстерәбез, хәзерге шартларда авыл хуҗалыгы икътисадның төп тармакларының берсенә әверелә бара», - диде Фәрит Мөхәммәтшин.
Чара авыл халкының эшлекле активлыгын арттыру мәсьәләләренә багышланган иде. Очрашуда муниципаль районнар башлыклары һәм Идел буе зонасының сигез районыннан авыл җирлекләре башлыклары, шулай ук шәхси ярдәмче хуҗалык һәм ферма, министрлык һәм ведомство җитәкчеләре җыелды.
Арина Потапова / «Татар-информ»
Киңәшмәдә Мөхәммәтшин җыелучыларга Татарстан Рәисе Рөстәм Миңнеханов сүзләрен җиткерде
«Эшкәртүне арттырырга кирәк. Өстәмә кыйммәтне республикада калдыру мөһим. Чималны түгел, ә эшкәртелгән продукцияне сату өстен булырга тиеш», - дигән ул.
Узган елда Татарстанда 5,3 млн тоннадан артык уңыш җыелган, тулаем сөт күләме 2 млн тоннадан артып киткән. Гомумән алганда, авыл хуҗалыгы продукциясе күләме 26 процентка арткан һәм 334 млрд сумга җитте.
«Россия Федерациясенең күп кенә субъектлары түбән төште, ә без сезнең белән икътисадны саклап кала алдык», - диде парламент җитәкчесе.