Лаешта парашютчылар Россия, Татарстан һәм Лаеш районы байракларын ачты
Татарстанның Биектау районының «Коркачык» аэродромыннан очып киткән самолеттагы парашютчылар республиканың Лаеш районында яшәүчеләр өчен Сабантуйда сюрприз ясады. Лаеш шәһәре өстендә күктә алар Россия, Татарстан һәм Лаеш районының байракларын ачты.
«Ел саен Лаеш Сабан туенда парашютчылар чыгышы традициягә әверелде. Тамашачылар аларны бик ярата, рәхәтләнеп карый. Без аларны ел саен чакырабыз», - дип сөйләделәр «Татар-информ»га муниципалитетның матбугат хезмәтендә.
Лаешта яшәүчеләр һәм кунаклар милли һәм спорт уеннарында катнашты.
Муниципаль берәмлек башлыгы Илдус Зарипов бәйрәмгә килгән халыкны Сабан туе белән котлады.
Сабан туенда халык ат чабышын яратып карый Хәерби авыл җирлеге өч призлы урынны алды. Беренче урынны Алмаз Вафин, икенче урынны Алсу Миндубаева алды, Вероника Селякина өченче булды.
Милли көрәшнең абсолют батыры кабат Муса Галләмов булды. «Төрле дәрәҗәдәге Сабантуй бәйрәмнәрендә 141 тапкыр чемпион булды, шул исәптән биш тапкыр федераль Сабан туенда», - дип сөйләделәр Лаеш администрациясендә абсолют батыр турында.
Галләмов мәйданнан яңа «Нива» автомобилендә кайтып китте. Махсус бүләкне DoorHan компаниясе президенты Александр Ханин әзерләгән. Баш батырга машина ачкычын Лаеш районы башлыгы Илдус Зарипов тапшырды.