Италиянең элекке премьер-министры Сильвио Берлускони вафат
Италиянең элекке премьер-министры Сильвио Берлускони 86 яшендә вафат булган. Ул озак авырудан соң үлгән. Бу хакта Corriere della Sera газетасы хәбәр итте.
Сәясәтче, «Алга, Италия» партиясенә нигез салучы һәм лидеры апрель башыннан бирле хастаханәдә үпкә ялкынсынуыннан дәваланган. Соңрак анда хроник миеломоноцитар лейкоз һәм үпкә инфекциясе ачыкланган. Берлускони Милан клиникасында химеотерапия курсы алган.
Хастаханәдән чыккач өч атнадан соң, сәясәтче 9 июньдә авыр хәлдә кабат хастаханәгә эләккән.
- Сильвио Берлускони 1936 елның 29 сентябрендә Миланда туган. 1993 елда «Алга, Италия» сәяси партиягә нигез сала, ә бер елдан соң премьер-министр була. Соңрак, хакимияткә килгән коалиция таркала, әмма сәясәтче үзенең популярлыгын саклап кала һәм 2001 елда яңадан премьер була, ул анда 2006 елга кадәр эшли.
- 2008 елда, үз партиясен «Азатлык халкы» дип үзгәртеп, Берлускони өченче тапкыр премьер-министр вазифасын биләде. 2011 елда отставкага китте, әмма үз партиясенең алыштыргысыз лидеры булып калды.
- Ике тапкыр өйләнгән, беренче хатыныннан ике баласы һәм икенче хатыннан өч баласы бар.