«Созвездие-Йолдызлык» талантлары Россия көнендә гранд-концерт күрсәтә
Россия көне уңаеннан Казан Кремлендәге «Кол Шәриф» мәчете каршындагы мәйданда «Созвездие-Йолдызлык» республика телевизион фестиваленең лауреатлары һәм җиңүчеләре концерты узачак. Ул ел саен үткәрелә. Чара 15.00 сәгатьтә башлана, керү түләүсез.
Проектның 350дән артык җиңүчесе һәм лауреаты 50гә якын истә калырлык номерлар тәкъдим итәчәк. «Йолдызлык»ның традицион концерты Татарстан Рәисе Рөстәм Миңнеханов игълан иткән Милли мәдәниятләр һәм гореф-гадәтләр елы кысаларында уза.
Фестивальдә Россия театр сәнгате институты (ГИТИС), Казан дәүләт консерваториясе, Казан музыка көллияте студентлары – фестиваль хәрәкәте чыгарылыш вәкилләре катнашачак. Сәхнәгә Татарстанның атказанган артистлары Илгиз Зәкиев, Владимир Шнитко, Әмир Әхмәдишин чыгачак.
«Концертның төп тематикасы – шәһәргә, республикага, илгә мәхәббәт. Безнең музыкаль бәйрәм-патриотик программа яшь буында Ватанга, гаиләгә мәхәббәт хисе тәрбияләүгә, төп кешелек кыйммәтләрен тәрбияләүгә юнәлдерелгән», – дип сөйләде фестивальнең башкарма директоры Наталья Смирнова.
Фестиваль хәрәкәтенең генераль продюсеры Дмитрий Туманов Россия гимнын коллектив башкару төп вакыйга булачагын әйтте.