Путин пилотсыз очу аппаратларын Россия бердәм һава киңлегенең бер өлеше итәргә кушты
Пилотсыз очу аппаратлары Россиянең бердәм һава киңлегенә интеграцияләнергә тиеш. РФ Президенты Владимир Путин 27 апрельдә узган пилотсыз авиация системаларын үстерү мәсьәләләренә багышланган чараларның нәтиҗәләре буенча ил Хөкүмәтенә шундый күрсәтмә бирде.
«Пилотсыз авиация системаларыннан куркынычсыз файдалануны тәэмин итү максатыннан пилотсыз һава судноларын Россия Федерациясенең бердәм һава киңлегенә интеграцияләү буенча тиешле чаралар кабул итәргә», - диелә Кремль сайтында урнаштырылган документта.
Пилотсыз очу аппаратларына кагылышлы «һава хәрәкәтен оештыруның цифрлы трансформациясе» әлеге нәтиҗәгә ирешүнең бер алымы буларак карала.
РФ Премьер-министры Михаил Мишустин 1 сентябрьгә кадәр әлеге күрсәтмәнең ничек үтәлүе хакында доклад тәкъдим итәргә тиеш. Алга таба ул бу хакта ярты елга бер тапкыр хисап тотарга бурычлы.
Элегрәк Владимир Путин Россиядә пилотсыз авиацияне үстерүгә 1 триллион сумга якын акча сарыф ителәчәге хакында хәбәр иткән иде.