Миңнеханов беренче пилотсыз «КАМАЗ»ларның Мәскәүгә барып җитүен хәбәр итте
ТР Рәисе телеграм-каналы
Татарстан Рәисе Рөстәм Миңнеханов хәбәр иткәнчә, пилотсыз «КАМАЗ»лар Мәскәүгә кадәр барып җиткән. Үзенең телеграм-каналында ул йөк машинасы кабинасыннан төшерелгән фотоны урнаштырган.
«Бу Россиядә беренче пилотсыз йөк ташу. Иртән Санкт-Петербургтан юлга чыккан йөк инде заказчыларга тапшырылды. Машиналар планлаштырылганнан бер сәгатькә иртәрәк килеп җитте», – дип язган республика җитәкчесе.
ТР Рәисе матбугат хезмәтеннән хәбәр итүләренчә, машиналар билгеләнгән урынга 20.30 сәгатькә килеп җиткән һәм 57 тонна йөк тапшырылган.
Кичә көндез Рөстәм Миңнеханов Санкт-Петербургта «КАМАЗ» пилотсыз йөк машиналары хәрәкәте өчен «Нева» М11 юлы участогын ачу тантанасында катнашты.