Казанның җиденче хастаханәсенә Марат Садыйков исеме бирелде
Марат Садыйков
Фото: © Владимир Васильев / «Татар-информ»
Казанның 7 нче шәһәр клиник хастаханәсенә Татарстанның элеккеге сәламәтлек саклау министры Марат Садыйков исеме бирелде. Республика Премьер-министры Алексей Песошин бүген шундый карар имзалады. Документ «Татар-информ» карамагында бар.
«Татарстан Республикасы сәламәтлек саклау министры, Татарстан Республикасының атказанган табибы Садыйков Марат Наил улы истәлеген мәңгеләштерү максатыннан, Министрлар кабинеты ТР Сәламәтлек саклау министрлыгының автоном сәламәтлек саклау учреждениесенә «М.Н.Садыйков исемендәге 7 нче шәһәр клиник хастаханәсе» исемен бирү турындагы тәкъдимен кабул итәргә карар итә», – диелә документта.
Сәламәтлек саклау министрлыгы 60 көн эчендә хастаханә уставын үзгәртергә тиеш.
Исегезгә төшерәбез, Марат Садыйков 53 яше тулып өч көн үткәч, быелның гыйнвар аенда вафат булды.