Хәрби операциядә катнашучыларны җинаять җаваплылыгыннан азат итү нигезләре расланды
Мобилизация вакытында, гамәлдә булган хәрби хәлдә яки сугыш вакытында РФ Кораллы көчләрендә хезмәт итүгә контракт төзегән гражданнарны җинаять җаваплылыгыннан азат итә торган закон проектын Дәүләт Думасы депутатлары хуплады. Канун проекты икенче һәм өченче укылышта хупланды. Бу хакта ТАСС хәбәр итә.
Билгеләп үтүләренчә, аз яки уртача дәрәҗәдәге җинаятьләр кылган һәм мобилизация буенча чакырылган яки контракт белән хезмәт иткән кешеләр дәүләт бүләге алган яки хәрби хезмәттән азат ителгән көннән башлап төрмә рәвешендәге җәзадан азат ителәчәк. Бу чара хөкем карары инде үз көченә кергән кешеләргә карата да гамәлдә булачак.
Думаның профильле комитеты РФ Җинаять кодексының әлеге гарантияләргә дәгъва итеп булмый торган маддәләрен билгели торган төзәтмәләрне хуплаган иде инде. Аларга террорчылык актлары кылу, террорчылык эшчәнлегенә ярдәм итү, террорчылыкны аклау, террорчылык эшчәнлеген гамәлгә ашыру максатында уку, террорчылык берләшмәсен яки оешмасын оештыру һәм анда әгъза булып тору керә. Яңа закон проекты шулай ук балигъ булмаганнарны көчләүдә, көчләү гамәлләре һәм балаларга һәм яшүсмерләргә карата җенси характердагы азгын гамәлләрдә гаеплеләргә кагылмаячак.
13 июньдә хәрби корреспондентлар һәм блогерлар белән очрашу вакытында Россия Президенты Владимир Путин әйтүенчә, махсус хәрби операциядә катнашканнан соң тоткыннар кабат җинаятьләрне сирәгрәк кыла.