Сарман районының Әлмәт мәктәбендә 12 елдан соң беренче чыгарылыш булган
«Сарман» кинотеатрында Морад Рәмзи исемендәге Әлмәт авылы мәктәбен тәмамлаган биш укучыга урта белем аттестатлары тапшырылган. Бу хакта «Сарман» газетасы яза.
Ике егет, өч кызның шатлыгын уртаклашырга әти-әниләр, җитәкчеләр килгән. Мәктәп директоры Рамил Садыйков укучыларга хәерле юл теләде, төп белем документларын тапшырды.
Шулай ук авылдашлары - Татарстанның танылган геологы Мирсаяф Салихов, район Башкарма комитеты җитәкчесе урынбасары Айрат Гайфутдинов, район мөхтәсибе Сәед хәзрәт, озак еллар Әлмәт мәктәбен җитәкләгән Рәҗәп Фәттахов, Сарман матбугат үзәге җитәкчесе Альбина Сабирова, мәгариф бүлеге методисты Рузилә Әхмәтшина, сыйныф җитәкчеләре Фәридә Заhирова, әти-әниләр исеменнән Венера Шәймәрданова тәбрикләде, истәлек бүләкләре тапшырдылар. Тантананы кинотеатр директоры Ринат Шәрәфетдинов алып барды, диелә хәбәрдә.