Троицк шәһәрендә төбәкара «Мөнәҗәт» бәйгесе була
6 июльдә Троицк шәһәрендә «Мөнәҗәт» төбәкара конкурсы узачак. Ул «Рәсүлев укулары» Бөтенроссия фәнни-гамәли конференциясенең мәдәни программасы кысаларында үткәрелә. Бөтендөнья татар конгрессы сайты шул турыда яза.
Бәйге күренекле мөселман дин белгече һәм мәгърифәтчесе, шәех Зәйнулла ишан хәзрәт Рәсүлевнең 190 еллыгына багышлана. Ул Троицк шәһәрендә яшәгән һәм андагы мөселманнарга белем биргән.
Бәйгедә Көньяк Урал территориясендә яшәүче үзешчән артистлар, солистлар һәм милли-мәдәни берләшмәләр ансамбльләре, Чиләбе өлкәсе, Казахстан Республикасы, Башкортстан Республикасы һәм Татарстан Республикасы шәһәрләрендә, районнарында сайлап алу турларында җиңүчеләр катнашачак.
Башкаручыларны өч юнәлеш буенча бәяләячәкләр:
- мөнәҗәтләрне театральләштереп башкару;
- Коръәннән шигъри сүрәләрне театральләштереп башкару;
- мөселман гимннары – нәшидләр башкару.
Бәйге нәтиҗәләре буенча жюри 5 номинациядә җиңүчеләрне билгеләячәк, ә Гран-при дипломын һәм призны Чиләбе өлкәсе губернаторы Алексей Текслер һәм Шәйх уль Ислам, Югары мөфти Тәлгать Таҗетдин «Рәсүлев укулары» Бөтенроссия фәнни-гамәли конференциясендә тапшырачак. Ул 7 июльдә Троицк шәһәрендә була.