«Зәкят» фонды Ямаш авылында янган мәчетне торгызуга 1 млн сумга якын акча бирә
Татарстан мөселманнары Диния нәзарәтенең «Зәкят» хәйрия фонды Татарстанда Корбан бәйрәме көннәрендә гадәттәгечә хәйрия башлангычларын тормышка ашыра.
Татарстан Диния нәзарәте хәбәр иткәнчә, шулай ук 7 мохтаҗ кеше 600 000 сумнан артык финанс ярдәме алачак; Татарстанның Мамадыш мөхтәсибәте Ямаш авылының янгыннан зыян күргән мәчетен торгызуга 1 млн сумга якын акча биреләчәк. Шулай ук ДНР һәм ЛНРдан килеп, Казан шәһәренең һәм республика районнарында вакытлыча урнаштыру пунктларында яшәгән 500 качак шәхси гигиена һәм көнкүреш химиясе әйберләреннән торган 2 тонна гуманитар ярдәм алды; ә Казанның аз керемле кешеләренә 50 азык-төлек җыелмасы тапшырылды.
«Зәкят» хәйрия фонды ярдәмен аз керемлеләр һәм күпбалалы гаиләләр, авырулар, балаларын ялгызы тәрбияләүче әниләр, өлкән яшьтәгеләр һәм социаль яктан якланмаган башка кешеләр ала. Корбан бәйрәме көннәрендә ТР мөселманнары Диния нәзарәтенең «Зәкят» хәйрия фонды 4 тоннадан артык корбан итен таратырга ниятли, диелә хәбәрдә.