Ульяновскиның «Өмет» газетасын һәр татар гаиләсенә яздырырга тырышалар
Ульяновскиның «Өмет» газетасында «Өмет»не – һәр татар гаиләсенә» дигән язма чыкты.
Агымдагы елның икенче яртыеллыгына язылу кампаниясе вакытында Димитровград татарлары аеруча активлык күрсәтте. Шәһәрнең «Лидер-Д» фирмасы генераль директоры Фәнис Фәрид улы Халиуллин, күркәм традициягә тугрылык саклап, педагогик хезмәт ветераннарына, татар теле түгәрәкләрдә өйрәнелгән мәктәпләргә һәм модельле китапханәгә (барлыгы 15 данә) подписка бүләк итте.
Ульяновск өлкә Законнар чыгару Җыелышы депутаты Рамил Надир улы Хайруллин Җәмигъ мәчетенә йөрүче 30 мөселман кардәшебезне «Өмет»кә яздырды. Бу эшне башкаруда мәчетнең имам-хатыйбы Ильяс хәзрәт Мухутдинов ярдәм итте.
Мәләкәс шагыйрәсе, «Өмет» газетасының С.Урайский исемендәге әдәби премиясе лауреаты Гөлсинә Ханәфи җирле автономия белән берлектә шәһәр Сабан туенда газетага яздыру ноктасы оештырган иде. Кыска гына вакыт эчендә дистәдән артык кеше яраткан «Өмет»ебезгә язылырга мөмкинлек тапты, дип ул шатлыгы белән уртаклашты.
Шәһәрнең Г.Тукай исемендәге 22 нче мәктәбе директоры Мөнирә Джумаева укытучыларның бу юлы да газетага актив язылулары турында хәбәр итте.