«Татнефть» һәм нефтьчеләр турында әдәби конкурска нәтиҗәләр ясалган
«Татнефть» хәйрия фонды Татарстан Язучылар берлеге белән берлектә игълан иткән әдәби конкурска нәтиҗәләр ясалган. Конкурста 97 профессиональ һәм һәвәскәр автор катнашкан. Алар арасыннан 22 лауреат һәм 10 дипломант билгеләнгән.
Җиңүчеләр исемлеге «Татнефть» хәйрия фонды һәм Татарстан Язучылар берлеге сайтларында урын алган. Жюри дүрт номинациядә - татар һәм рус телләрендә шигырь һәм хикәя язучылар арасында I, II һәм III урын алучыларны билгеләгән.
«Татар телендә иң яхшы хикәя» номинациясендә I урынны – Факил Сафин (Чаллы), II урынны Гөлүсә Батталова (Әтнә), III урынны Алинә Бикмуллина (Казан) һәм Линар Закиров (Мәскәү) алган. Артур Ибраһимов (Әлмәт) һәм Булат Ибраһимовка диплом тапшырыла.
«Татар телендә иң яхшы шигырь» номинациясендә I урынны Ландыш Габдрахманова (Әтнә) һәм Лилия Гыйбадуллина (Чаллы) алган, II урында – Дания Галәветдинова (Казан) һәм Гөлчәчәк Хаҗиева (Азнакай), III урында – Зөлфия Миргасыймова, Илсияр Сәлахова, Рәфкать Шаһиев (Әлмәт), Гөлназ Хәйруллина (Казан), Әлфия Хаҗиәхмәтова һәм Сирень Якупова (Чаллы). Чаллыдан Фәйрүзә Хәбибуллина-Яхинага диплом тапшырыла.
- Конкурс шартлары буенча әдәби әсәр нефтьчеләр һәм «Татнефть» турында булырга тиеш иде.
- Лауреатларга акчалата премия каралган.
- Республика күләмендәге әдәби конкурс Татарстанда нефть чыга башлауның 75 еллыгы уңаеннан оештырылган иде.
- Иң яхшы әсәрләр махсус җыентыкта басылачак, оешманың корпоратив матбугат чараларында да һәм сайтларында урын алачак диелгән иде конкурс игъланында.