Каюм Насыйриның туган авылында Апанай мәдрәсәсе шәкертләренең чыгарылыш чарасы узды
Казан шәһәре Апанай мәдрәсәсендә 3-14 июль көннәрендә ир балалар өчен ислам нигезләре буенча курслар үткәрелде. Башкалабызның төрле почмакларыннан йөреп дин нигезләрен 7-14 яшьлек 58 бала үзләштерде. Укучылар курслар дәвамында ислам дине нигезләреннән тыш татар халкының бай мирасы, мең еллык гореф-гадәтләре белән танышты. Бу хакта ТР Диния нәзарәте матбугат хезмәте хәбәр итә.
Шәкертләр һәр көнне өйләгә кадәр дини дәресләр алдылар, аннары мәдәни чараларга, музейларга, төрле шәхесләр белән очрашуларга, лекцияләргә йөрделәр. Җәйге ял үсеп килүче буынга татар дин галимнәре мирасын тапшыруны, рухи-тарихи ядкәрләргә, халкыбызның гореф-гадәтләренә хөрмәт тәрбияләүне, кул эшләренә өйрәтүне бурыч итеп куйды. Оештыручылар – Казан шәһәре Апанай мәдрәсәсе һәм «Иман» мәдәният-мәгърифәт үзәге.
15 июльдә курсларның тәмамлануына багышланган бай бәйрәм чарасы, шул исәптән Сабан туе уеннары һәм ярышлар узды. Балалар татар мәгърифәтчесе, тел галиме, язучы, тарихчы, этнограф Каюм Насыйриның туган җиренә – Яшел үзән районы Кече Шырдан авылына барды. Чара Татарстан Республикасында игълан ителгән Милли мәдәниятләр һәм гореф-гадәтләр елы кысаларында һәм Каюм Насыйриның тууына 200 ел тулуга әзерлек йөзеннән үткәрелде.