Аксубай районы башлыгы ялга кайткан мобилизацияләнгәннәр белән очрашты
Аксубай районы башлыгы Камил Гыйльманов Ватанны саклаучыларга якташлардан рәхмәт сүзләрен җиткерү һәм хәрбиләр белән шәхсән аралашу өчен аларның һәрберсе белән очрашырга тырыша.
Чираттагы очрашу узган атнада булды. Хәрбиләр белән очрашуга махсус хәрби операция зонасына гуманитар йөк илтүче волонтерларны да чакырдылар. Бу хакта «Авыл таңнары» хәбәр итә.
Камил Гыйльманов геройларга батырлыклары өчен рәхмәт белдерде. Ул билгеләп үткәнчә, җитәкчелек кенә түгел, район халкы да бүген хәрбиләргә ярдәм итү турындагы уртак фикер белән яши. Егетләргә нинди ярдәм кирәклеге, аларның гаиләләренең нәрсәгә мохтаҗ булулары турында очрашу барышында фикер алыштылар.
«Аллаһы Тәгалә сезне сакласын, егетләр. Без сезгә ярдәм иттек һәм мөмкин булганча ярдәм итәчәкбез! Үзегезне саклагыз, биредә сезнең ышанычлы тылыгыз барын белеп торыгыз!» – дип йомгаклады сүзен район башлыгы.