Ангола Татарстан белән хезмәттәшлекне киңәйтү белән кызыксына
Ангола Татарстан белән тагын да тыгызрак хезмәттәшлек итәргә, шулай ук бу хезмәттәшлекне берничә юнәлеш буенча киңәйтергә тели. Бу хакта Анголаның Россиядәге Гадәттән тыш һәм Тулы вәкаләтле илчесе Аугусто да Силва Кунья Татарстанның Россиядәге Тулы вәкаләтле вәкиленең халыкара һәм икътисади элемтәләрне координацияләү буенча урынбасары Фәннур Гарифуллин белән очрашуда белдерде.
Очрашу Мәскәүдә, Ангола Республикасының Россия Федерациясендәге Илчелегендә узды.
Гарифуллин Татарстанның сәүдә-икътисади потенциалы турында сөйләде. Республика сәясәтендә өстенлекле юнәлешләрнең берсе - Африка илләре белән мөнәсәбәтләрне җайга салу һәм тирәнәйтү, дип билгеләп үтте ул.
Илче үз чиратында билгеләп үткәнчә, Ангола «КАМАЗ» ГАҖ белән озак һәм нәтиҗәле мөнәсәбәтләргә ия, дип хәбәр итә Татарстанның Россиядәге Тулы вәкаләтле вәкиллеге матбугат хезмәте.
Аугусто да Силва Кунья шулай ук Татарстан белән кайбер юнәлешләр буенча тагын да тыгызрак хезмәттәшлек белән кызыксынуын белдерде. Алар - авыл хуҗалыгы һәм машина төзелеше продукциясен сатып алу, файдалы казылмалар чыгару буенча уртак инвестиция проектларын гамәлгә ашыру мөмкинлеге, шулай ук Татарстанның югары уку йортларында Ангола студентлары санын арттыру.
Аугусто да Силва Кунья шулай ук «Алабуга» махсус икътисади зона эшчәнлеге белән дә кызыксынды.
Алар шулай ук Татарстан һәм Ангола делегацияләренең икенче саммитта һәм «Россия - Африка» икътисади форумы эшендә катнашуы мәсьәләләре буенча да фикер алышты. Форум агымдагы елның 27-28 июлендә Санкт-Петербургта уза.