Татарстан Рәисе Эшләр идарәсе киберһөҗүмнәрдән саклануга 6,7 миллион сум акча юнәлдерәчәк
Татарстан Рәисенең Эшләр идарәсе мәгълүматлаштыру объектлары мәгълүматларын техник яклауга республика бюджетыннан 6 миллион 700 мең сумнан артык акча юнәлдерәчәк. Дәүләт сатып алулары сайтында шундый мәгълүмат урнаштырылган.
Подрядчыга ПЭВМ базасында ике автоматлаштырылган эш урынын һәм электрон язу машинкасы базасында бер эш урынын аттестацияләргә, берничә бинаны аттестацияләргә туры киләчәк. Шул ук вакытта, башкаручы «хезмәт һәм коммерция серләре булган мәгълүматның конфиденциальлеген катгый сакларга тиеш» дип искәртелә.
Эшләрне контракт төзелгәннән соң 30 көн дәвамында башкару каралган.
Исегезгә төшерәбез, элегрәк «Татар-информ» ел башыннан Татарстанның цифрлы ресурсларына һөҗүмнәр саны 2022 ел белән чагыштырганда берьюлы 10 тапкырга арткан булуын хәбәр иткән иде. Ә 2021 ел күрсәткечләрен алсак, ул 120 тапкыр булган. Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министрлыгына «суверен интернет» ярдәмендә киберһөҗүмнәр санын киметергә тәкъдим иттеләр.