Татарстанда мәктәп ашханәләрен капиталь ремонтлау программасының 95 проценты башкарылган
Татарстанда мәктәпләрдәге азык-төлек блокларын ремонтлау тәмамланып килә - 143 объектта эшләр 95 процентка үтәлгән. Бу хакта Татарстан Республикасы Төзелеш, архитектура һәм торак-коммуналь хуҗалык министрының беренче урынбасары Алексей Фролов Хөкүмәт Йортында узган шимбә киңәшмәсендә хәбәр итте.
Ул үткән ике атна эчендә 56 объектта эшләр тәмамлануын әйтте, дип хәбәр итә ТР Рәисе матбугат хезмәте.
Исегезгә төшерәбез, июль азагындагы киңәшмәдә Татарстан Премьер-министры Алексей Песошин ТР төзелеш министрлыгына яңа уку елы башланганчы кирәкле җиһазлар алып килеп көйләү өчен мәктәп ашханәләрен ремонтлауны 15 августка кадәр тәмамларга кушкан иде.