Менделеевски мәктәбендәге татар театры «Сугыш ярасы» дигән премьерасын тәкъдим итте
«Менделеев Мирасы» дигән мәктәп театры «Сугыш ярасы» дип аталган татарча спектакль тәкъдим итте. Муниципаль берәмлек матбугат хезмәтендә «Татар-информ» агентлыгына белдерүләренчә, театр әле күптән түгел генә оештырылган, «Сугыш ярасы» исә аларның репертуарындагы беренче спектакль.
Театр оештыруның инициаторы – «Беренчеләр хәрәкәте»нең җирле бүлеге җитәкчесе Гөлнара Гайфетдинова. Театрның сәнгать җитәкчесе – Фаилә Ахунҗанова.
Спектакльдә сугыш вакытында шәфкать туташларының сугышчыларга ничек ярдәм күрсәтүенә басым ясала, оешканлык, бер-береңә ярдәм итү сыйфатлары чагылыш таба.
Спектакль тәмамланганнан соң Менделеевск районы башлыгы Радмир Беляев аның актуальлеген һәм татар телендәге контентның әһәмиятен билгеләп үтте. «Артистларыбызга зур рәхмәт әйтәм, бу аларның беренче тәҗрибәсе. Без яңа проект гамәлгә ашыра башладык. Һәм бу очраклы рәвештә генә эшләнмәде, чөнки «Мирас» татар гимназиясендә капиталь ремонт төгәлләнеп килә, балалар театры шунда урнашачак», – дип искәртте Радмир Беляев.