Рөстәм Миңнеханов Иран икътисад министры урынбасары белән очрашты
Татарстан Рәисе Рөстәм Миңнеханов Иран икътисад министры урынбасары Мөхәммәд Җәвад Шәрифзадә белән очрашты. Ул Казанга эш сәфәре белән килгән. Бу хакта Татарстан җитәкчесе матбугат хезмәте хәбәр итә.
Иран делегациясе республикага «Мир Бизнес Банк» ислам банкингы офисын ачу тантанасына килде. Татарстан Рәисе ассызыклаганча, бу — Иранның Татарстан белән хезмәттәшлеген гамәлгә ашыруның конкрет мисалы.
«Россия-Иран мөнәсәбәтләре кысаларында Татарстан Иран Ислам Республикасы белән хезмәттәшлекне үстерүгә зур әһәмият бирә. Безнең илләр — игелекле күршеләр һәм кискен халыкара проблемаларны хәл итүдә партнерлар», — дип искәртте Рөстәм Миңнеханов.
Ул Россия белән Иранның хезмәттәшлеге Газа секторындагы хәлнең кискенләшүе контекстында аерым әһәмияткә ия икәнлегенә игътибрны юнәлтте. Президентлар Владимир Путин һәм Ибраһим Рәиси конфликтны хәл итү вариантлары турында фикер алышып, даими диалогны хуплыйлар, дип билгеләп үтте.
Иран Шанхай хезмәттәшлек оешмасының тулы хокуклы әгъзасы булды, Россия-Иран товар әйләнеше узган елгы нәтиҗәләр буенча 15 процентка — 4,6 млрд долларга кадәр артты, дип өстәде Миңнеханов.