Россиялеләргә пенсиягә акча туплауның тагын бер алымын атадылар
2024 елның 1 гыйнварыннан озак сроклы саклык акчаларын формалаштыру программасы гамәлгә керә. Санкт-Петербург дәүләт университетының хезмәт һәм социаль хокук кафедрасы ассистенты Фатыйма Ногайлиева «Прайм» агентлыгына биргән интервьюсында пенсияне арттыру өчен аннан ничек файдаланырга икәне турында сөйләде. Бу хакта РИА Новости агентлыгы хәбәр итә.
Аның сүзләренчә, программада катнашырга теләүчеләргә дәүләтнеке булмаган пенсия фонды белән тиешле килешү төзергә кирәк. Шул ук вакытта, программада катнашучы беренче елда взносны үзе түли, дәүләт исә икенче елдан кушыла. Бергәләп финанслау өч ел дәвам итә.
Дәүләт, взнос күләме 2 мең сумнан да ким булмаган очракта, гражданнарның взносларын финанслау йөкләмәсен үз өстенә ала, әмма күләмнәр программада катнашучының керемнәренә бәйле. «Ул өсти торган максималь сумма – елына 36 мең сум», - дип ачыклык кертте эксперт.
Вакытлы түләүләрне ай саен 60 яшькә җиткән ир-атлар һәм 55 яшькә җиткән хатын-кызларның алу мөмкинлеге бар. Юрист сүзләренчә, бу түләүләр сроклы (10 елдан да ким булмаган срокка) яки гомерлек булырга мөмкин.