Рәис Миңнеханов Саба районы Шәмәрдән авылында 103 яшьлек әбине туган көне белән котлаган
Саба районы башлыгы Рәис Миңнеханов Шәмәрдән авылында 103 яшен тутырган Тайфә әби Лотфуллинаны туган көне белән котлаган.
«Дөнья мәшәкатьләрен күреп, ачлыгын-ялангачлыгын үз җилкәсе аша үткәреп, сугыш афәтләрен кичереп, парлы тормыш коргач 8 бала тәрбияләп үстергән Тайфә әбине тәбрикләргә Рәис Миннеханов килде. Район башлыгы Тайфә әбигә сәламәтлек, бәхетле картлык теләде», – дип хәбәр итә «Саба дулкыннары» телерадиокомпаниясе.
Тайфә Лотфуллина белән Рәис Миңнеханов үткәннәр турында озак сөйләшеп утырган. Тайфә әби Рәис Нургалиевичка хәл белешеп, аны тәбрикләргә килгәне өчен рәхмәтен җиткергән.
«8 бала тәрбияләп үстердек, оныкларым инде 50 яшьтән уздылар, 20 оныкчыгым бар», – дип сөйләгән Тайфә әби Лотфуллина. Ул бүгенге рәхәт, тыныч, мул, бай тормышта сөенеп яшәвен белдергән.