Сәлимгәрәев Халыкара мәгълүмат чаралары форумы катнашучыларын KazanForum-2024 кә чакырды
Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев Согуд Гарәбстанында Халыкара массакүләм мәгълүмат чаралары форумында катнашучыларны «Россия — Ислам дөньясы: KazanForum 2024» форумына чакырды.
Җиддә шәһәрендә узган форум «Медиа һәм нәфрәт белән көч куллануны кузгатуда аның роле (мәгълүматны бозу һәм алдан ук дөрес булмаган караш)» темасына багышланган. Ул Ислам Хезмәттәшлеге Оешмасының OIC Мәгълүмат агентлыклары берлеге һәм Бөтендөнья мөселман лигасы тарафыннан оештырылган.
Сәлимгәрәев форумда Татарстан мисалында Россиядә дуслык мохите булдыру тәҗрибәсе белән уртаклашты. Ул республиканың бай тарихы, уникаль мәдәни мирасы һәм югары үсеш алган икътисады булган төбәк икәнлеген билгеләп үтте. Биредә 175 милләткә караган 4 миллионнан артык кеше яши, халыкларның мәдәниятара һәм конфессияара үзара хезмәттәшлегенең бай тәҗрибәсе тупланган.
Республикада тынычлык һәм тотрыклылыкны ныгытуда дәүләт сәясәте массакүләм мәгълүмат чаралары тармагында зур роль уйный. Мәсәлән, төрле телләрдәге басмалар ярдәм ала. Алар Россиядә милләтләрнең гражданлык бердәмлеге, милләтара һәм конфессияара килешү, дәүләт телен һәм башка телләрне, илнең һәм анда яшәүче халыкларның гореф-гадәтләрен һәм тарихын өйрәнү темаларына өстенлек бирә. Этник мөнәсәбәтләргә багышланган төрле чаралар, белем бирү программалары һәм бәйгеләр үткәрелә.
«Хәзерге вакытта массакүләм мәгълүмат чаралары этник мөнәсәбәтләрне гармонияләштерү һәм җәмгыятьтә толерантлык дәрәҗәсен күтәрү өчен этәргеч көч булып тора. Нәкъ менә шуңа күрә хәзерге шартларда массакүләм мәгълүмат чаралары хезмәттәшлеге бернәрсәдә дә дәүләтләр дипломатиясеннән калышмый», — дип ышана республика матбугат һәм массакүләм коммуникацияләр агентлыгы җитәкчесе.
Сәлимгәрәев республикага Якын Көнчыгыштан, Үзәк, Көньяк-Көнчыгыш Азия һәм башка илләрдән килгән журналистлар Татарстанның икътисади һәм мәдәни потенциалын бәяли алды инде, дип искәртте.
«Татарстан Республикасы ислам дәүләтләре белән мәдәният, фән, мәгариф, спорт, яшьләр сәясәте, иҗтимагый дипломатия һәм дин өлкәсендә хезмәттәшлекне үстерүгә зур игътибар бирә», — дип билгеләп үтте ул. Шулай ук Россия Президенты Владимир Путин кушуы буенча Татарстан Рәисе Рөстәм Миңнехановның «Россия — Ислам дөньясы» стратегик күзаллау төркемен җитәкләвен сөйләде.
Мондый чараларның иң әһәмиятлесе булып ел саен үткәрелә торган «Россия — Ислам дөньясы: KazanForum» Халыкара икътисади форумы санала. 2023 елда узган чарада төрле илләрдән 15 меңнән артык кеше катнашты, мәйданчыкта 130 килешү һәм меморандум имзаланды. Мәйданчыкта массакүләм мәгълүмат чараларыннан 450ләп вәкил эшләде, шуларның 78е Татарстанга чит илләрдән килде.
«Без массакүләм мәгълүмат чараларының илләр арасында үсеш һәм икътисади партнерлыкның этәргеч көче икәнлегенә нык ышанычтабыз. Нәкъ менә шуңа күрә хәзерге шартларда ММЧ хезмәттәшлеге дипломатиянең бер өлеше булып тора, ул гомуми рухи һәм әхлакый кыйммәтләр нигезендә гамәлгә ашырыла», — дип ассызыклады Айдар Сәлимгәрәев.
Ул билгеләп үткәнчә, Татарстан чит ил коллегалары белән матбугат турлары белән алмашырга һәм уртак белем бирү чаралары үткәрергә, шул исәптән Ислам Хезмәттәшлеге Оешмасы илләре вәкилләренә безнең яшәү рәвешебезгә һәм традицияләребезгә Россия мөселманнарының карашын аңлатырга әзер.
«Миңа бирелгән мөмкинлектән файдаланып, сезне, хөрмәтле коллегалар, 2024 елның 14-19 маенда узачак XV [Халыкара] «Россия — Ислам дөньясы: KazanForum» юбилей форумына чакырырга рөхсәт итегез. Һәм, әлбәттә, без сезне Татарстанда теләсә кайсы вакытта күрүебезгә шатбыз», — диде ул.
Җиддәдә масштаблы форумда төрле конфессияләр һәм мәдәниятләрнең халыкара дини лидерлары, мәгълүмат министрлары, UNA мәгълүмат агентлыклары әгъзалары, Америка, Кытай, Европа һәм Россиянең халыкара массакүләм мәгълүмат чаралары, Ислам Хезмәттәшлеге Оешмасы генераль секретариаты, Ислам Хезмәттәшлеге Оешмасының даими делегатлары катнашты.
Исегезгә төшерәбез, быел май аенда «Татмедиа» һәм Ислам Хезмәттәшлеге Оешмасының мәгълүмат агентлыклары берлеге хезмәттәшлек турында меморандумны имзалады.
Фото, видео: «Татмедиа» Республика матбугат һәм массакүләм коммуникацияләр агентлыгы