Ирада Әюпова: Минем мәдәни объектлар мәсьәләсендә өч «авырткан урыным» бар
Мәдәният министры Ирада Әюпова журналистлар белән очрашуында мәдәни объектларда өч «авырткан урыны» барлыгын әйтте. «Алар буенча процесс яки башлана гына яки әле бөтенләй аңлашу юк», – диде ул.
«Аның берсе – Милли музей. Сиксәненче еллардагы янгыннан соң аңа чынлап торып ремонт булганы юк. Декабристлар урамы, 4 нче йортта вакытлыча булса да фондларны куеп торырга бина бирделәр. Әмма беренчедән, анда күчәргә фонд саклаучыларның теләге юк. Икенчедән, Россия мәдәният министрлыгы десант җибәрде – алар бөтен таләпләр күрсәтелгән бәяләмә әзерлиләр. Әлегә без «тупик»та», – диде ул.
Борчылу тудырган биналарның икенчесе – Казан ТЮЗы. Ирада Әюпова ТЮЗ ишегалдындагы ике катлы бер бинаның «Мәдәният» илкүләм проектына эләгүен, аның буенча проект-смета документациясе әзерләнүен әйтте. «Этаплап эшләячәкбез», – диде ул.
Ремонт көткән биналарның өченчесе - Казан театр училищесы. «Ике бинаны кушу идеясе бар иде, чөнки студентлар ике арада йөри. Әмма бу мәсьәләне әле уйлап бетерәсе бар, чөнки мәдәни мирас объекты», – диде ул.
Журналистларның Милли китапханә карамагында булган Ушкова йорты турындагы сораулары буенча министр әлегә ачык җавап бирә алмады. «Бүгенге көндә бина Милли китапханә балансында», – диде ул.
Ирада Әюпова республика горурлыгы булган мәдәни биналарны да искә алды. «Заманында Туфан Миңнуллин Дәүләт Советында «Чаллыда театр бинасы юк, Милли китапханә начар хәлдә», – дип чыгыш ясаган иде. Бу аның вафаты алдыннан соңгы чыгышы булгандыр. Бүген Милли китапханә дә яңа бинада. Чаллыда федераль ресурслар белән ике театр төзедек. Түбән Камада бүгенге көндә ике театр – Татар дәүләт театры һәм ТЮЗ», – диде ул.