Ләйлә Фазлыева туристларны Татарстанга кабат кайтарачак төп шартны әйтте
Татарстанның туризм тармагының төп бурычы - сәяхәтчеләр кабат республикага кайтырлык шартлар булдыру. Бу хакта Татарстан Туризм буенча дәүләт комитетының йомгаклау коллегиясендә республика вице-премьеры Ләйлә Фазлыева хәбәр итте, дип яза «Татар-информ» хәбәрчесе Арсений Кәримов.
«Татарстан - илнең туристлык тармагында әйдәп баручы үзәкләрнең берсе. Ләкин шуның белән без тынычланырга тиеш түгел. Безгә килүчеләр продуктның югары сыйфатлы булуын көтә, ул гаҗәпләндерергә, илһамландырырга, тәэсирләр калдырырга һәм кунакларны тагын бер тапкыр республикага кайтарырга тиеш. Туристлар кабат кайтсын өчен, нәкъ менә тәкъдим ителә торган продукт сыйфатын яхшырту бурычы өстенлекле булып кала», - дип билгеләп үтте спикер.
Ул белдергәнчә, бу уңайдан тармак өчен кадрлар әзерләү мөһим мәсьәләгә әверелә. Бу юнәлеш буенча эш агымдагы елда төп бурычларының берсе булачак.
«Без кайбер һөнәри белем бирү оешмалары, югары уку йортлары белгечләр әзерләвен аңлыйбыз, әмма безгә тагын бер кат җыелырга һәм без гамәлгә ашыра һәм җәелдерә алырлык төгәл бурычларны билгеләргә кирәк дип уйлыйм», - дип өстәде вице-премьер.
Кадрлар кытлыгы проблемасын хәл итүнең бер ысулы «кунакчыллык дәресләре» булырга мөмкин, мәктәпләрдә туристлык өлкәсе белгечлекләре турында сөйлиләр һәм өйрәтәләр, дип өстәде Татарстан Туризм буенча дәүләт комитеты рәисе Сергей Иванов.
«Бигрәк тә сезон вакытында персонал күбрәк таләп ителә. Татарстан Рестораторлар һәм отельерлар ассоциациясенең бу мәсьәләне хәл итүдә уңай тәҗрибәсе бар. Хезмәттәшләр мәктәпләрдә дәресләр үткәрә һәм югары сыйныф укучыларын кафеларда һәм рестораннарда эшләргә җәлеп итә. Бу тәҗрибәне җәелдерүдә һәм аны башка туристик объектларга таратуда ярдәм итү безне бурыч булуын күрәбез», - дип хәбәр итте Иванов.
Ул шулай ук быел Татарстанда туристлык тармагы эшенә нәтиҗә ясау турында сөйләде һәм киләчәккә планнар белән уртаклашты. Иң киң күләмле максатлар арасында Лаешта яхталар порты булдыру, Бөек Идел юлын үстерү һәм М12 трассасы ачылу белән бәйле автомобильдә сәяхәт итүчеләре өчен инфраструктура булдыру бар.
«М12 трассасы барлыкка килү белән туристлар агымы бу юл уза торган районнарга, якында урнашкан районнарга да артачак. Туристларны әлеге локацияләргә җибәрү өчен туристлык навигациясе системасын үстерергә кирәк. Хәзердән үк Яшел Үзән, Кама Тамагы, Мамадыш районнарында аның җитмәве сизелә. М12 юлын ачу — зур вакыйга, ул Татарстанда туризмны үстерү өчен яңа перспективалар ача», - дип өстәде Иванов.
Коллегия Татарстанның туризм тармагын үстерүгә зур өлеш керткән кешеләрне бүләкләү тантанасы белән тәмамланды.