Путин «Киләчәк уеннары» турында: Россия киберспорт буенча иң масштаблы ярышлар үткәрәчәк
Россия Президентына кандидат һәм гамәлдәге дәүләт башлыгы Владимир Путин ышанычлы затлар белән очрашуда Казанда булачак «Киләчәк уеннары»н киберспорт буенча дөньяда иң масштаблы ярышлар дип атады.
«Киберспортка килгәндә, хәзер ярышлар планлаштырыла. Алар бик кызыклы булыр дип ышанам. Мондый масштабтагы ярышларны дөньяның әле бер генә иле дә үткәрмәгән. Без монда беренче адымнар ясыйбыз», — дип ассызыклады Россия лидеры (ТАСС китергән цитата).
«Ул, беренче чиратта, мондый заманча спорт төрләре белән кызыксынучы яшьләрне җәлеп итсен иде. Без аны, һичшиксез, дәвам итәчәкбез», — дип вәгъдә итте Владимир Путин.
Элегрәк «Татар-информ» хәбәр иткәнчә, «Киләчәк уеннары»нда катнашачагын дөньяның 107 иленнән командалар раслаган. Моңа кадәр турнирның дисциплиналары һәм уздыру урыннары аталды.
«Киләчәк уеннары» халыкара мультиспорт турниры Татарстан башкаласында 2024 елның 21 февраленнән 3 мартына кадәр узачак. 14 ноябрьдә Халык хуҗалыгы казанышлары күргәзмәсендә «Казанда Киләчәк уеннары башланырга 100 көн кала» тантанасы узды, анда Россия Президенты ярышлар башлану көннәрен санауга старт бирде.