Мәскәүдә «Коръән турында 100 искиткеч факт» китабының презентациясе узды
27 гыйнварда Мәскәүдә «ДАР» мәдәният үзәгендә «Коръән турында 100 искиткеч факт» китабының презентациясе узды. Презентацияне Россия мөселманнары Диния нәзарәтенең Мәдәният департаменты һәм «Читай» нәшрият йорты әзерләгән. Бу хакта Россия Мөфтиләр шурасы матбугат хезмәте хәбәр итә.
Китапны тәкъдим итүдә Россия мөселманнары Диния нәзарәтенең Мәдәният департаменты җитәкчесе Ренат Әбәнов, Мәскәү мөфтие урынбасары, «ДАР» үзәге җитәкчесе Марат Арсланов һәм «Укы» («Читай») нәшрият йорты директоры Илшат Сәлахетдинов катнашты, алар «ДАР» үзәге укучыларын яңа китап белән таныштырды.
Ренат Әбәнов «Россиядә Коръән турында 100 искиткеч факт» китабында илебезнең төрле чорларына кагылган һәм төрле кешеләр белән бәйле тарихлар: руханилар һәм сәясәтчеләрдән алып мәдәният эшлеклеләренә һәм хәтта спортчыларга кадәр тупланганлыгы турында белдерде.
Россия мөселманнары Диния нәзарәтенең Мәдәният департаменты җитәкчесе билингваль техника хисабына (китап рус телендә инглиз теленә параллель тәрҗемә белән бастырылган) «Россиядә Коръән турында 100 искиткеч факт» хезмәте ватандашларыбызга гына түгел, чит илләрдәге укучыларга да гаҗәеп вакыйгалар турында сөйләргә ярдәм итәчәк, дип өстәде.
Кереш сүзләрдән соң спикерлар тамашачыларның сорауларына җавап бирделәр һәм мондый чараларны мөмкин кадәр ешрак үткәрергә вәгъдә иттеләр.
Россия мөселманнары Диния нәзарәтенең Мәдәният департаменты «ДАР» мәдәни үзәге җитәкчелегенә һәм коллективына чараны оештыруда һәм үткәрүдә ярдәм иткәне өчен зур рәхмәт белдерә, диелә хәбәрдә.