Миңнеханов Татарстан Арбитраж суды эш йомгаклары турында: Гаделлек арта бара
Тышкы авырлыкларга карамастан, Татарстан тотрыклы үсешен дәвам итә. Узган ел нәтиҗәләренә караганда, төбәктә тулай продукт күләме — 4 трлн сум, озатылган продукция күләме — 4,6 трлн сумнан артык, ә төзелеш эшләре күләме 700 млрд сум тәшкил иткән. Бу хакта Татарстан Республикасы Арбитраж судының йомгаклау киңәшмәсендә Татарстан Рәисе Рөстәм Миңнеханов белдерде.
«Ел йомгаклары — икътисадның барлык тармакларының, барлык дәрәҗәдәге хакимият органнарының бердәм эше нәтиҗәсе. Һәм, һичшиксез, уртак эшкә республиканың Арбитраж суды да үз өлешен кертте, аның эшчәнлеге илнең икътисади тотрыклылыгын тәэмин итү белән тыгыз бәйләнгән», — дип билгеләп үтте Миңнеханов.
Татарстан Рәисе игътибарны республикада салым бурычлары кимү тенденциясе күзәтелүенә юнәлтте һәм аны киметү эшен дәвам итәргә кушты.
Миңнеханов шулай ук суд утырышларын үткәргәндә веб-конференцияләр һәм видеоконференцэлемтәнең кирәклеген бәяләде. Әйтик, 2022 ел белән чагыштырганда, узган елда аларны кулланып үткәрелгән утырышлар саны биш тапкырга арткан.
«Арбитраж процессына мәгълүмати технологияләр кертү аркасында гаделлеккә юл арта бара», — дип ассызыклады Татарстан Рәисе.
Ул банкротлык күренешенә аерым тукталды, чөнки Татарстанда бурычын түләргә мөмкинлеге булмау турында гаризалар саны артуын дәвам итә.
«Мондый категориядәге эшләрне караганда җәмәгатьчелек һәм шәхси мәнфәгатьләр балансын тәэмин итү — катлаулы, әмма мөһим бурыч. Банкротлык процедурасын шундый итеп үткәрергә кирәк — бурычлының дәүләт алдындагы һәм башка кредиторлар алдындагы бурычларын, бигрәк тә хезмәт хакы ягыннан, максималь үтәрлек итеп», — дип белдерде Рөстәм Миңнеханов.
Татарстан Рәисе билгеләп үткәнчә, суд карарларын үтәү мәсьәләсе актуаль булып кала, чөнки бу гадел хөкем системасы эшенең нәтиҗәлелеген бәяләүнең мөһим критерие.
«Бозылган хокукларны торгызу, законлы мәнфәгатьләрне яклау суд карарында гына түгел, ә чынлыкта да үтәлергә тиеш. Бу эштә суд приставлары хезмәте белән нәтиҗәле хезмәттәшлек аеруча мөһим», — дип нәтиҗә ясады Рөстәм Миңнеханов.