Илнур Гайниев: Камал театрының бездән соң «Ситса туй»ны куюы – Минзәлә театрына дәрәҗә
Минзәлә театры үзе өчен махсус язылган «Ситса туй» спектаклен Казанга алып килә. Соңрак спектакль Камал театрында куелып зур уңыш белән барганга Минзәлә куелышына да сорау арткан.
«Әйе, Илгиз Зәйниев бу пьесаны безнең артистларыбыз өчен махсус язды. Ул Минзәләгә спектакль куярга кәгазьгә төшерелгән пьеса белән түгел, башындагы идея һәм тезислар белән килде. Камал театрында «Ситса туй» спектакле чыкканнан соң бу темага кагылышлы сораулар күбәйде. Аларның бездән соң «Ситса туй»ны куюы – Минзәлә театрына дәрәҗә», дип әсәр тарихын сөйләде Минзәлә театры директоры Илнур Гайниев театрның Казан гастрольләренә багышланган матбугат конференциясендә.
Бу Илгиз Зәйниевнең Минзәлә театрында дебюты булган. Рольләргә актерларны театр режиссеры, курсташы Дамир Самерханов белән бергә сайлаган. «Пьеса бездә язылып бетте. Спектакль бик уңышлы чыкты – аннары аны Камал театры да куйды. Бездә дә гөрләп бара», диде Илнур Гайниев
Директор Камал театры куелышын Казанга махсус килеп караган. «Икесе ике төрле спектакль. Ике төрле күзаллау. «Нишләп бездән репертуардан төшкәнен көтмәделәр? Нишләп бирдегез?» дип артистлар миңа бераз үпкә белдереп йөрделәр», дип сөйләде ул.
«Ни кызганыч, без Казаннан еарк театр булгач, медиа мәйданчыгында алар кадәр мөмкинлекләребез юк. Аларның колачы киң. Казанга елга бер килеп шул форсаттан файдаланып гөрләтеп алабыз да, үзебезчә кайнашып торабыз», диде ул.
Ул спектакльне Казанга белән Мәскәүгә дә баруларын, гастрольләргә актив йөрүләрен, кырыклап муниципаль районда булуларын өстәде.
«Быел гаилә елы. Яшь гаиләләрдә төрле аңлашылмаучанлыклар да килеп чыга. «Ситса туй» спектакле шундый хәлләрне чишә торган мәгънәле сүзләре белән дә миңа бик кадерле», диде әлеге әсәрдә ЗАГС хезмәткәре ролен башкарган Татарстанның атказанган артисты Чулпан Бәдретдинова.
- һСабир Өметбаев исемендәге Минзәлә дәүләт татар драма театры башкалабыз Казанга өч көнлек гастрольләргә килә: 15 февральдә Казанның № 2 гимназиясендә Ильяс Закировның «Онытмаска иде үткәнне» әдәби – драматик хатирәсе; 16 февральдә Камал театры сәхнәсендә Туфан Миңнуллинның «Шулай булды шул» мелодрамасы; 17 февральдә Камал театры сәхнәсендә Илгиз Зәйниевның «Ситса туй» моңсу комедиясе күрсәтелә.