Бастрыкинга Чистайда коега төшеп китү очрагын тикшерү барышы турында белдерәчәкләр
Россия Тикшерү комитеты җитәкчесе Александр Бастрыкинга Чистайда балалар коега төшеп киткәннән соң кузгатылган җинаять эшен тикшерү барышы турында хәбәр ителәчәк. Бу хакта ведомствоның матбугат хезмәтендә хәбәр итәләр.
Элек хәбәр ителгәнчә, кар белән капланган коега 4 һәм 6 яшьлек балалар төшеп киткән. Балалар курыккан, аларның әнисе кешеләрне ярдәмгә чакыра башлаган. Бәхеткә, узып баручы ир-ат ярдәмгә килә, ул машинадан аркан алып малайларны чыгара. Балаларга кирәкле ярдәмне күрсәтәләр.
Тикшерүчеләр «Ваемсызлык» маддәсе буенча эш кузгаткан. Ведомство җитәкчесе Россия Тикшерү комитетының Татарстан буенча Тикшерү идарәсе җитәкчесе вазифасын башкаручы Павел Олейникка җинаять эшен тикшерү барышы турында хәбәр итәргә кушкан.