Путин Россия Президентын сайлауда онлайн тавыш биргән
Россиянең хәзерге Президенты Владимир Путин дәүләт башлыгын сайлауда тавыш бирүдә катнашкан. Бу аның Кремльдәге кабинетында онлайн режимда узган.
Тавыш бирү мизгелләре белән видеофрагмент Кремльнең телеграм-каналында басылып чыккан. Путинның өстәл янына килеп утырып, вариантларның берсенә басканы күренә (экран күренмәсен өчен, трансляция кырыйдан барган). Аннары «Рәхмәт, сез уңышлы гына тавыш бирдегез!» дигән язу белән монитор күрсәтелә.
- Россия Федерациясендә сигезенче тапкыр Президент сайлау 15, 16 һәм 17 мартта уза. Сайлауларга дүрт кандидат: Владислав Даванков («Яңа кешеләр» партиясеннән), Леонид Слуцкий (ЛДПР партиясеннән), Николай Харитонов (КПРФ партиясеннән) һәм гамәлдәге дәүләт башлыгы Владимир Путин (үз-үзен тәкъдим итүче буларак) кертелгән.