Валентина Матвиенко: Фәрит Мөхәммәтшин Татарстанның динамик үсешенә зур өлеш кертә
Бүген танылган сәясәтче һәм җәмәгать эшлеклесе, Татарстан Республикасы Дәүләт Советы Рәисе Фәрит Мөхәммәтшин үзенең туган көнен билгеләп үтә, аның 30 елга якын хезмәт биографиясе парламент эшчәнлегенә багышланган. Бу турыда Татарстан Дәүләт Советы матбугат хезмәте хәбәр итте.
РФ Федераль Җыены Федерация Советы Рәисе Валентина Матвиенко үзенең котлавында Фәрит Мөхәммәтшинның Россия парламентаризмын ныгытуга керткән өлешен билгеләп үткән.
«Тәҗрибәле һәм акыллы җитәкче буларак, сез Татарстанның динамик үсешенә зур өлеш кертәсез, республиканың социаль-икътисади потенциалын тормышка ашыру өчен күп эшләр башкарасыз, – диелә телеграммада. – Гаҗәеп югары профессионализм, искиткеч шәхси сыйфатлар, кешеләргә карата һәрвакыт игътибарлы һәм хөрмәтле мөнәсәбәттә булуыгыз белән Сез төбәк халкы арасында абруй казандыгыз. Киләчәктә дә Сез Ватаныбыз файдасына нәтиҗәле хезмәт итәрсез, Татарстан Республикасы Дәүләт Советының нәтиҗәле эшләвенә, Россия парламентаризмын ныгытуга зур өлеш кертерсез дип ышанам».
РФ Федераль Җыены Дәүләт Думасы Рәисе Вячеслав Володиннан Фәрит Мөхәммәтшинга сәламәтлек һәм алга таба нәтиҗәле эш теләген белдергән телеграмма килде. «Сайлаучылар мәнфәгатьләрен яклап, Татарстан Республикасының социаль-икътисади үсешен законнар белән тәэмин итеп, Сез төбәк халкының иминлегенә юнәлдерелгән максатларга ирешүгә өлеш кертәсез», – диелә аның котлавында.
Республика парламенты җитәкчесен туган көне белән котлап, Татарстан Рәисе Рөстәм Миңнеханов Фәрит Мөхәммәтшинның Дәүләт Советында, «Бердәм Россия» партиясенең төбәк бүлегендә һәм Татарстан халыклары Ассамблеясында алып барган күпкырлы эшчәнлегендә уңышлар теләгән. «Мондый җитди һәм масштаблы эштә, стратегик әһәмияткә ия булган мәсьәләләрне хәл итүдә актив катнашу сезнең уникаль эшчәнлегегезне дә, катлаулы эшләрегезне дә чагылдыра», – диела аның тәбрикләү хатында.
Фәрит Мөхәммәтшинга котлау хатын Санкт-Петербургның Закон чыгару Җыелышы рәисе Александр Бельский да җибәргән. «Үз илеңә, халкыңа хезмәт итү – кешеләрнең иң изге максатларыннан берсе, – дип ассызыклаган ул. – Сез Татарстанның үсеше, анда яшәүчеләрнең тормышы яхшырсын өчен бөтен көчегезне бирәсез. Сезгә һәм хезмәттәшләрегезгә бу мөһим эштә уңышлар телим! Санкт-Петербургның Закон чыгару Җыелышы һәрвакыт безнең гражданнар файдасына Татарстан Республикасы белән парламент элемтәләренең үсешен хуплый».
Котлау телеграммалары шулай ук Россия субъектларның дәүләт хакимияте закон чыгару (вәкиллек) органнары җитәкчеләреннән, РФ Федераль Җыены Дәүләт Думасы депутатларыннан, чит илләрнең Казандагы дипломатик вәкиллекләре җитәкчеләреннән килде, диелә хәбәрдә.