Ҳукумат девальвация оқибатларини юмшатиш учун 1 млрд. доллар қарз олмоқчи
Ўзбекистон ҳукумати миллий валюта девальвацияси оқибатларини юмшатиш учун Жаҳон банкидан 1 миллиард АҚШ доллари миқдорида қарз олишни режаламоқда.
Sputnik нашрининг РИА Новости агентлигига таяниб хабар қилишича, ноябр ойида томонлар қарз шартларини муҳокама қилади.
Ўзбекистон ҳукумати бу пул билан ўзбек сўмининг кескин девальвациясидан кейин ижтимоий соҳада юзага келган вазиятни юмшатишни режаламоқда.
Хабарда айтилишича, қарз шартларини 2018 йилнинг биринчи чорагигача келишиб олиш, 2018 йилнинг иккинчи ярмида эса келишувни Жаҳон банки директорлар кенгашига тақдим қилиш режаланган.
Шунингдек, хабарда бу маблағ ҳақида келишувга эришиш масаласи президент Мирзиёевнинг АҚШга сафари давомида ҳал бўлгани айтилди.