Моуриньо келаси мавсум режаларини айтди. Унда Шомуродовга ўрин борми? — Бизга қўшилинг: ???? https://t.me/joinchat/AAAAADwt0NGCRoONT4f1_Q
Жозе Моуриньо бир йил ичида “Рома”ни яхши томонга ўзгартира олди. Гарчи римликлар бу мавсум Чемпионлар лигаси йўлланмасидан қуруқ қолган бўлса-да, Еврокубокларда иштирокини давом эттираётган Италиянинг ягона жамоаси сифатида Конференциялар лигаси бош совринини ҳам қўлга киритиши кутилмоқда. Португалиялик мутахассис келаси мавсум учун режалари билан ўртоқлашди. - Биз Чемпионлар лигасига чиқишга уриниб кўрамиз. Лекин “Интер”, “Милан” ва “Ювентус”нинг трансферлардаги фаоллиги ва даражасига қараб, лигага йўлланма берадиган тўртта ўриндан учтаси банд эканига амин бўласиз. Хуллас, тўртинчи ўрин бор. Ўтган йили бу ўрин “Аталанта”га теккан эди. Бу йил тўртинчи жамоа “Наполи” бўлади. Хўш, биз келаси мавсум шу ўринга кўтарила оламизми? Шу иш қўлимизда келадими? Албатта, буни уддалай оламиз, деб ўйлайман. Мавсумнинг иккинчи ярмида, январдаги трансфер ойнасида таркибга ижобий ўзгартириш кирита олдик. Истаган ўйинчисини сотиб оладиган айрим мураббийларга солиштирганда, бу борада мен омадсизман. Келаси мавсумда, ҳар бир босқични ривожлантириш орқали бунга эришамиз. Имконимиз бор ва бу олдимизда турган асосий мақсад. Ҳозир ҳаммаси бир маромда кетяпти. Чунки ҳали икки йиллик шартномам бор. Клуб ҳали уни узайтириш бўйича менга мурожаат қилгани йўқ. Улар мени қарор қабул қилиш ҳолатига қўймоқчи эмас. Ҳаммаси барқарор кўринишда, аслида шундай ҳам бўлиш керак. Мен мавсумни имкон қадар яхшироқ якунланиш ва навбатдагисига 100 фоиз тайёр бўлишим керак. Мен ишимни ўзгартирмоқчи эмасман ва атрофимдагилар бундан яхшигина хабардор. Иккинчи мавсум олдидан клубни ташлаб кетолмайман. Шундай экан кейинги мавсумда ҳам мен шу ерда бўламан, - деди Жозе Моуриньо. Жозе Моуриньо Рим клубини ўтган йили ёзда қабул қилиб олганди. Клубга эгалик қилувчи Фридкинлар оиласи португалиялик мутахассис олдига “Рома”ни Чемпионлар лигасида мунтазам иштирок этадиган, Италия чемпионлиги учун курашадиган қудратли жамоага айлантириш вазифасини қўйган. Аввалги клубларидан фарқли равишда Моуриньо жамоа таркибини янгидан шакллантириши талаб этилади. Илгари юлдуз даражасидаги ўйинчиларни бошқарган Жозе энди “Рома” футболчиларини юқори савияга олиб чиқиши керак. Моуриньо “Рома”га келганидан кейин таркибни сезиларли даражада ўзгартирди. Бу янгиланишлар буёғига ҳам давом этиши кутилмоқда. Ҳозирги футболчилар жамоа олдига қўйилган учта вазифадан иккитасини уддалай олмади. Фридкинлар оиласи “Рома”нинг мавсум охирида кучли тўртликдан жой олиб, Чемпионлар лигасида қатнашишини истаганди. Амалда “бўрилар” Европа лигасига йўл очадиган 5-6-ўринлар учун курашяпти. Шунингдек, пойтахтликлар Италия кубогини эрта якунлади. Аниқроғи, плей-оффда кучли рақиб – “ИНтер” дуч келиб, римликларни мусобақадан чиқариб юборди. Энди Моуриньо олдида сўнгги вазифа – Конференциялар лигаси бош совринини қўлга киритиш вазифаси турибди. Португалиялик мутахассис айни пайтда Чемпионлар лигаси, Европа лигаси ва Конференциялар лигаси финалига чиққан ягона мураббий ҳисобланади. Агар “Рома” 25 май куни Албаниянинг Тирана шаҳрида бўладиган финал учрашувида “Фейеноорд”ни енгса, Жозе Моуриньо УЕФА таснифидаги учта турнирда зафар қучган биринчи мураббий сифатида тарихда қолади.