Тошкент шаҳар ЙҲХБ ходимлари алимент тўламагани учун қарийб 3 йилдан бери қидирувда бўлган шахсни аниқлади
Қидирувдаги фуқаро қўлга олинди, деб хабар беради ИИВ матбуот хизмати.
Жорий йилнинг 3 июнига ўтар кечаси Мирзо Улуғбек тумани Шаҳрисабз кўчасида ЙПХ инспекторлари А.Абдуғаниев ва Ш.Абдуазизов ўз хизмат вазифаларини бажарган. Пиёдани тўхтатиб, уни маълумотлар базасидан хизмат планшети ёрдамида текшириб кўрганида, 1983-йилда туғилган ушбу фуқаро Қашқадарё вилояти Қарши шаҳрида яшовчи бўлиб, 2019-йил 19-августдан буён қидирувда экани маълум бўлди.
У Ўзбекистон Республикаси Жиноят кодексининг “Вояга етмаганларни ёки ногиронларни боқишдан бўйин товлаш” моддаси билан боғлиқ жиноятда айбланиб, қидирувга берилган. У ушбу модданинг 1-қисми билан айбланмоқда, бу эса 1 йилгача озодликдан маҳрум қилиш билан жазоланиши мумкин.