Эквадорда шаҳар мэри отиб ўлдирилди
Эквадор шаҳарларидан бирининг мэри объектни кўздан кечираётганда уюштирилган ҳужум натижасида отиб ўлдирилди, дея хабар беради BBC News.
Якшанба куни Манта шаҳрида унинг мэри Агустин Интриаго қуролли шахс томонидан бир неча марта яраланган. Шунингдек, ҳужум вақтида мэрнинг ёнида бўлган маҳаллий футболчи Ариана Эстефания Чанкай ҳам ҳалок бўлди.
Полиция ҳозирча ҳужумчининг мақсадини тасдиқламади, бироқ Интриаго мэрига таҳдид қилинганини айтди.
Расмийларнинг айтишича, мэрга ўғирланган пикапда келган қуролли шахс томонидан бир неча марта ўқ узилган. Мэр олган жароҳатлари туфайли шифохонада вафот этган.
Пикап машинасини бошқараётган эркак қувиш пайтида яраланган ва ҳибсга олинган, аммо ўқ узган шахс қочишга муваффақ бўлган.
Мэр Интриаго февраль ойида иккинчи тўрт йиллик муддатга қайта сайланган эди. Ҳужум пайтида у янги канализация тизими қурилаётган қурилиш майдончасини кўздан кечираётган эди.
Унга маҳаллий «Лас Драгонас» клубининг 29 ёшли футболчиси Ариана Чанкай мурожаат қилди. У шаҳар мэридан ҳаваскор жамоасини қўллаб-қувватлашини сўрамоқчи эди.
Бу қотиллик Эквадорни ҳайратда қолдирди, у ерда яқин вақтгача сайланган амалдорларга ҳужумлар кам учрар эди.
Февраль ойида Пуэрто Лопес мэрлиги учун курашаётган сиёсатчи сайлов участкалари очилишидан бир неча соат олдин ўлдирилган эди.
Бир неча ҳафта олдин бошқа бир қирғоқ шаҳарчаси Салинас мэрлигига номзод ҳам отиб ўлдирилган.