Банкдан ҳужжатсиз 500 долларгача хорижий валюта олишга рухсат берилди
Ўзбекистонда банк хизматлари соҳасида яна бир қулайлик жорий этилмоқда. Эндиликда фуқаролар банклардан 500 АҚШ долларигача бўлган нақд хорижий валютани шахсни тасдиқловчи ҳужжатларсиз олиш имконига эга бўлади.
Мазкур янгилик Ўзбекистон Республикаси Адлия вазирлиги ташаббуси билан ишлаб чиқилган ҳамда 8 май куни давлат рўйхатидан ўтказилган идоравий ҳужжатда белгиланган.
Янги қоидаларга мувофиқ, банк мижозларини текшириш жараёни (идентификация) маълум суммагача соддалаштирилади. Яъни, 500 АҚШ долларигача бўлган операциялар учун паспорт, ID-карта ёки бошқа шахсни тасдиқловчи ҳужжатларни тақдим этиш талаби бекор қилинади.
Аввалги тартибга кўра, бундай енгиллик фақат 100 долларгача бўлган операциялар учун амал қиларди. Энди эса ушбу лимит беш баравар оширилмоқда.
Мутахассисларнинг таъкидлашича, ушбу ўзгариш банк хизматларидан фойдаланишни янада осонлаштириш, ортиқча бюрократик жараёнларни камайтириш ва аҳолига қулайлик яратишга қаратилган.
Шу билан бирга, юқорироқ суммаларда мижозни тўлиқ идентификация қилиш, яъни шахсини аниқлаш ва тасдиқлаш талаблари сақланиб қолади. Бу эса молиявий хавфсизликни таъминлаш учун муҳим ҳисобланади.
Мазкур янги тартиб уч ой ўтгач кучга киради. Шундан сўнг фуқаролар банкларда кичик миқдордаги валюта операцияларини ҳужжатларсиз амалга оширишлари мумкин бўлади.
