Резедә Шәрәфиева, коньяк эчеп, бала табарга киткәнен сөйләде
Татар эстрадасында бәрхет тавышлы, искиткеч зәвыклы, хит җырлар башкаручы, Татарстанның халык артисты Резедә Шәрәфиева «Татарстан – Яңа гасыр» каналындагы «Сөйләшергә вакыт» тапшыруында кунакта, дип таныштырды алып баручы Лилия Кадыйрова. Җырчы тапшыруда бала көткән һәм тапкан мизгелләрен искә төшерде.
«Баланы миңа дус кызым Наилә Наилевна таптырды. «Өйдә таба башласам, нишләрмен, дип куркам», – дидем аңа. «Таба башласаң яхшы булыр иде әле», – диде миңа.
Яңа фатир биргәннәр иде. 9 катлы йортта бер кеше дә яшәми, без иң беренче ремонт ясадык та яши башладык. 5 катта торабыз, лифт эшләми. 40 яшь тулырга 3 көн кала, 7 гыйнварда җыендык. Беренчедән, әтинең туган көне, икенчедән, русларның яхшы бәйрәме. «Бу – әйбәт көн, табарга кирәк», – дип уйладым. Аллаһтан сорау юк.
Бала таптырасы дустым, «син яхшылап йокларга тырыш, эшләргә барасың» ди. Йокы юк бит инде, теш сызлый, теш тә түгел, нерв булды микән. Сызлый инде. Мин коньякны авызда тотам да йотып җибәрәм, ике чәркә коньяк эчеп, бала табарга киттем. Юлда барышлый Наиләне эшкә алып киттек. «Йоклый алмадым, 2 чәркә коньяк эчтем», – дип әйттем.
Бала тудыру йортына килгәч ятып торган идем, йоклап киткәнмен. «Бала табарга кергән, үзе рәхәтләнеп йоклап ята», – дигән тавышка уянып киттем. Бик ашыйсы килә. «Ашарга ярыймы соң?» – дип сорыйм шул ападан. «Берни булмый, аша», – ди. Рәхәтләнеп икенче ашны ашап куйдым, компот эчтем.
«Тордыңмы?» – дип кереп җиттеләр. Бала табуны тизләтә торган уколлар кададылар. Дустым Гөлназ килде, ул, журналист буларак, бала табу процессы турында язарга теләде. Гөлназ авызыма су сала, мин Наиләдән авырттырмый торган укол кадавын сорыйм, ә ул ботка бала табуны тизләттерә торганны сала. Бу бит – минем шушы көнне табасы килеп табу. Шулай 2 сәгатьтә таптым. Бала чыкканда, «Зөләйха» диде Гөлназ. Шулай итеп, Зөләйхалы булдык. Исем уйланылмаган иде дә, Гөлназ кушты менә», – дип хатирәләре белән уртаклашты җырчы.