Москва: Крым татарларынын таламын талашкандар камалды
Алар Крым татарлары террорчулукка катышы бар деген шек менен кармалып жатканына нааразылык билдиришкен.
Өткөн айда Ростов-на-Дону шаарынын аскердик соту «Хизб ут-Тахрир» диний-экстремисттик уюмунун белдүү мүчөсү деп саналган беш Крым татарын эркинен ажыраткан.
Алардын бири Теймур Абдуллаевге Симферополдо аталган уюмдун бөлүмүн түзгөн деген айып коюлуп, 17 жылга эркинен ажыратылган. Калгандары 12ден 13 жылга чейин кесилген.
Крым татарлары өздөрүнө коюлган айыпты четке кагып келишет. Алардын адвокаттары доо арыз менен соттун жогорку инстанциясына кайрылышкан.
Москва Крымды аннексиялап алгандан бери Орусияда тыюу салынган уюмга мүчө болгон деген негизде ал жакта жашаган 70тей киши кармалган.
«Мемориал» укук коргоо уюму 2014-жылы Крым татарлары Орусияга кошулууга каршы чыкканы үчүн Москва аларды куугунтуктап жатат деп эсептейт.