Россия төбәкләрендәге татарлар гадәттән тыш хәлләрдән зыян күрүчеләргә ярдәм күрсәтә
(Казан, 25 март, «Татар-информ»). 18 март көнне, X Бөтенроссия татар эшмәкәрләре җыены вакытында, гадәттән тыш хәлләрдән зыян күрүчеләргә гуманитар ярдәм күрсәтү өчен акча җыю акциясенә старт бирелгән иде. Бөтендөнья татар конгрессының матбугат хезмәте хәбәр иткәнчә, хәзерге вакытта җыелган акчага кирәкле кием-салым һәм азык-төлек алынган. Бүген әлеге акциягә Төмән, Самара, Омск, Пенза өлкәләрендә, Магнитогорск шәһәрендә яшәүче татар эшмәкәрләре һәм татар оешмалары да кушылган.
Шунысын да искәртик: 29 мартта әлеге гуманитар ярдәмнең беренчесен, йөк автомобильләренә төяп, авыр тормыш хәлендә калган ватандашларыбызга озатачаклар. Гуманитар ярдәм Донецк һәм Луганск халык республикаларына китә.
«Кирәк-яраклар Бөтендөнья татар конгрессы Фонды хисабына алынды. Ярдәм күрсәткән эшмәкәрләргә олы рәхмәтебезне белдерәбез. Акция алга таба да дәвам итәчәк. Тиздән изге Рамазан ае башлана. Бу - изге гамәлләр ае да», диелә хәбәрдә.
Гадәттән тыш хәлләрдән зыян күрүчеләргә ярдәм итүдә үз өлешен кертергә теләүчеләр өчен реквизитлар белән түбәндәге сылтама аша танышырга мөмкин.