Путин прогласи неработна седмица како мерка за борба против ковид-19
Рускиот претседател Владимир Путин денеска го одобри владиниот предлог за седумдневен одмор на вработените поради алармантниот раст на новозаразени и починати од ковид-19. Зборувајќи на состанокот со претставниците на владата, кој беше пренесуван и на телевизија, Путин рече дека периодот за одмор предвиден од 30 октомври до седми ноември може да почне и порано или да се продолжи во одредени региони.
Локалните власти низ земјата направија ваков чекор за да го спречат ширењето на вирусот кое се случува и поради противењето на дел од граѓаните да се вакцинираат против ковид. Во последните 24 часа во Русија починаа 1028 лица како последица на вирусот, што е највисока дневна бројка од почетокот на епидемијата. За истиот период регистрирани се и 34 073 новозаразени, а од почетокот на епидемијата досега во земјата се заразиле 8.094.825 лица.
Рекордни бројки на починати од ковид-19 во Источна Европа
Во Москва од вчера во сила се нови ограничувања. Работодавачите мораат 30 отсто од вработените да ги испратат да работат од дома, а на возрасните и луѓето со хронични болести им се препорачува самоизолација.