Сөйгән егетенең туган көнен уздырганда яшь кызны баржа астындагы су суырып алган
Омск шәһәрендә 28 яшьлек Анжелика Иртыш елгасында суда батып үлгән. Аны баржа астына су суырып алып кереп киткән. Бу турыда «Новый Омск» сайты язды. 12 июньдә Анжелика дуслары һәм туганнары белән бергә елга буена килә. Яшьләр парк янындагы урында яр буенда бәйрәм уздырмакчы була. Анжеликаның сөйгән егете туган көнен бәйрәм итә. Якынча версия буенча, Анжелика дуслары яныннан читкәрәк китә һәм су буена төшеп аягын чылатмакчы була. Бу урында су коену тыелган. Шул чакта Анжеликаны су суыра башлый, моны егете күреп ала. Бу турыда «Омск.Онлайн» сайты полициягә сылтама белән хәбәр итә. Урынга полиция һәм водолазлар бара. Югалган кызны «Доброспас-Омск» коткару-эзләү отряды да эзләшә. «Компания Иртыш буенда ял итә. кыз аягын чылатырга китә. Аны баржа астына су тартып керткән. Аның баш киеме Иртыш буйлап агып киткәнен күргәннәр, дип сөйлиләр», — ди коткаручы отряды вәкиле. Анжелика турында бер атна дәвамында бер хәбәр булмый. 19 июньдә кызның мәете табыла. «Ул кешеләр күз алдында һәлак булган — аны баржа астына су суырып алып кереп киткән», — дип аңлатканнар Эчке эшләр министрлыгында.