Ալիևն Էրդողանին տեղեկացրել է ղարաբաղյան հակամարտության կարգավորման բանակցային գործընթացում առկա իրավիիճակի մասին
Արմինֆո. Ադրբեջանի նախագահ Իլհամ Ալիևը Թուրքիայի իր պաշտոնակից Ռեջեփ Թայիփ Էրդողանին տեղեկացրել է Լեռնային Ղարաբաղի հակամարտության կարգավորման բանակցային գործընթացում առկա իրավիճակի մասին:
Ինչպես հաղորդում են ադրբեջանական ԶԼՄ-ները, այդ մասին հայտարարել է Արդբեջանի նախագահ Իլհամ Ալիևը` Թուրքիա-Ադրբեջան բարձր մակարդակի ռազմավարական համագործակցության խորհրդի 6-րդ նիստից հետո մամուլի ասուլիսում: Ադրբեջանի ղեկավարն ափսոսանքով նշել է այն փաստը, որ հակամարտությունը լուծված չէ` բանակցություններում առաջընթացի բացակայության համար ողջ մեղքը բարդելով Հայաստանի վրա: Ալիևը նաև նշել է, թե Ադրբեջանի նկատմամբ կիրառվում են երկակի ստանդարտներ: Նա համոզմմունք է հայտնել, որ հակամարտությունը պետք է կարգավորվի միջազգային իրավունքի հիման վրա` Ադրբեջանի տարածքային ամբողջականության շրջանակում: «Ադրբեջանը երբեք թույլ չի տա, որպեսզի իր հողերում ստեղծվի երկրորդ հայկական պետություն: Ես արդեն թուրք գործընկերոջս շնորհակալություն եմ հայտնել այդ հարցում աջակցության համար: Բոլոր միջազգային կազմակերպություններում Թուրքիան միշտ սատարում է Ադրբեջանի արդար գործին՚, - հայտարարել է Ալիևը:
Նա անդրադարձել է նաև Թուրքիայի հետ պաշտպանական համագործակցությանը և ընդգծել, որ այս տարի անցկացվել է երեք համատեղ զորավարժություն, երկուսը` Բաքվում, մեկը` Նախիջևանում: «Այդ գործոնն ամրապնդում է ռազմական ոլորտում մեր համագործակցությունը: Մենք շարունակում ենք համագործակցությունը նաև ռազմատեխնիկական բնագավառում: Թուրքիայի օրեցօր զարգագացող ռազմարդյունաբերական համալիրը մեծ հետաքրքրություն է հարուցում մեզանում: Մենք Թուրքիայից ձեռք ենք բերում և ձեռք կբերենք ռազմական արտադրանք՚, - եզրափակել է Ադրբեջանի ղեկավարը: