Արմեն Աշոտյան. Ղարաբաղյան հակամարտության կարգավորման շուրջ բանակցային գործընթացն ադրբեջանական քարոզչության մաս չպետք է կազմի
Արմինֆո.Ղարաբաղյան հակամարտության կարգավորման շուրջ բանակցային գործընթացն ադրբեջանական քարոզչության մաս չպետք է կազմի, այսօր մամուլի ասուլիսի ժամանակ հայտարարել է ԱԺ արտաքին հարաբերությունների հանձնաժողովի ղեկավար Արմեն Աշոտյանը:
Նա նշել է, որ խաղաղության նոր պլատֆորմ ստեղծելու Ադրբեջանի գաղափարը ԱՀ իշխանությունների հերթական իմիտացիան է: Պատգամավորն ընդգծել է, որ այդ հարցը քննարկվել է Կիևում «Եվրանեսթ» խորհրդարանական վեհաժողովի նիստում, որտեղ ադրբեջանական կողմը հանդես էր եկել երկու երկրների քաղաքական գործիչների և հասարակությունների երկխոսության օգտին: Արմեն Աշոտյանը նաև ընդգծել է, որ նման շփումներն, անշուշտ, անհրաժեշտ են: «Վստահ եմ, որ մեզ անհրաժեշտ է վերսկսել երկխոսությունը և վերականգնել վստահությունը, սակայն միաժամանակ նման բանակցությունները չպետք է ադրբեջանական քարոզչության մաս կազմեն: Բայց տվյալ դեպքում տեսնում ենք, որ ադրբեջանականբ կողմը դրան էլ ձգտում է: Բանակցույթուններ պետք է վարել լուրջ՝ ԵԱՀԿ Մինսկի խմբի աջակցությամբ, այլ ոչ թե՝ ինչ-որ իմիտացիոն պլատֆորմներում»,- նշել է Աշոտյանը:
Նշենք, որ խաղաղության առաջին պլատֆորմն ստեղծվել էր 2016 թվականին Բաքվում, սակայն այն դադարել էր գործել: Իսկ երկրորդ պլատֆորմն ստեղծվել է 2017 թ. հոկտեմբերին Թբիլիսիում: «Ելք» դաշինքից «Եվրանեսթ» պատվիրակության անդամ Մանե Թանդիլյանը նշել է, որ նման քաղաքական հարթակները հայկական պատվիրակություններին հնարավորություն են ընձեռում պայքարել ադրբեջանական կողմից մշտապես տարվող հակահայկական քարոզչության դեմ: Նա ընդգծել է այն փաստը, որ ադրբեջանական կողմը չափազանց ակտիվ է գործում միջազգային հարթակներում: «Այլ երկրներից գործընկերների հետ մեր զրույցներից պարզ է դառնում, որ նրանցից ոմանք աջակցում են ադրբեջանական տեսակետներին: Մենք պետք է մասնակցենք միջազգային բոլոր միջոցառումներին, և, ի հակակշիռ ադրբեջանական կողմի, ներկայացնենք մեր դիրքորոշումը»,- ընդգծել է պատգամավորը: