Նիկոլ Փաշինյանը Վիգեն Սարգսյանին անվանել է «ցինիկ» և ցմահ «ռեֆերենտ»՝ քննադատելով նրան «Ազգ-բանակ» հայեցակարգի գաղափարի «գողության» համար
Արմինֆո. «Ելք» ընդդիմադիր խմբակցության ղեկավար Նիկոլ Փաշինյանն այսօր խորհրդարանի ամբիոնից «Զինվորական ծառայության և զինծառայողի կարգավիճակի մասին» օրենքի նախագծի քննարկման ժամանակ, որը ենթադրում է պարտադիր զինվորական ծառայությունից տարկետման իրավունքի վերացում՝18 տարին լրացած և բանակում ծառայության հետ անհամատեղելի առողջական խնդիրներ չունեցող բոլոր երիտասարդների համար, խիստ քննադատության է ենթարկել պաշտպանության նախարար Վիգեն Սարգսյանին:
«Վիգեն Սարգսյանի ելույթը խորհրդարանում այլ կերպ, քան ցինիկ և անհեթեթ, անվանել չի կարելի»,- հայտարարել է Փաշինյանը՝ դժգոհություն հայտնելով այն փաստի առնչությամբ, որ խորհրդարանում այդքան կարևոր փաստաթղթի ներկայացման ժամանակ պաշտպանության նախարարը բացակայում է նիստերի դահլիճից:
Փաշինյանին հատկապես դուր չի եկել Վիգեն Սարգսյանի այն հայտարարությունը, որ ինքը քաղաքական գործիչ է: «Վիգեն Սարգսյանից ի՞նչ քաղաքական գործիչ: Նա ամբողջ կյանքում եղել և մնում է ռեֆերենտ, ով իր կյանքն անցկացրել է տարբեր պաշտոնյաների ընդունարաններում: Սկզբում Ազգային ժողովի նախագահի ընդունարանում, այնուհետև՝ պաշտպանության նախարարի ընդունարանում հետո՝ նախագահի աշխատակազմի տարբեր կաբինետներում: Նա այսօր էլ պաշտպանության նախարար չէ, նա հիմա ՊՆ-ում Սերժ Սարգսյանի ռեֆերենտն է»,- հայտարարել է Փաշինյանը:
Պատգամավորը դժգոհություն է հայտնել նաև այն փաստի առնչությամբ, որ ՊՆ-ն բանակում ծառայությունից Վիգեն Սարգսյանի տարկետման փաստաթղթային հիմնավորումներ չի տրամադրել իրեն: «Ինձ ասացին, որ դրանք ոչնչացված են և ներկայացրեցին Սարգսյանի դիպլոմի պատճենը, որտեղ նշվում է, որ 1992 -1997 թթ. նա սովորել է Երևանի պետական համալսարանում: Դա նրանք ներկայացրեցին՝ որպես տակետման հիմնավորում: Մինչդեռ Սարգսյանի կենսագրության մեջ գրված է, որ նշված ժամանակահատվածում նա սովորել է Սանկտ Պետերբուրգում»,- հայտարարել էՓաշինյանը:
Այնուհետև նա քննադատության է ենթարկել պաշտպանության նախարարին այն բանի համար, որ վերջինիս «սեփականաշնորհել» է «Ազգ-բանակ» հայեցակարգի հեղինակային իրավունքները: «Վիգեն Սարգսյանը մշտապես խոսում է այդ հայեցակարգի մասին՝ մոռանալով, որ դրա հեղինակը ոչ թե ինքն է, այլ արցախյան պատերազմի հերոս, ներկայումս ձերբակալված Ժիրայր Սեֆիլյանը»,- հայտարարել է Փաշինյանը:
Նշենք, որ խորհրդարանն այսօր զինծառայության մասին օրենքի նախագիծը քննարկում է 2-րդ ընթերցմամբ: Օրինագիծը խորհրդարանում ներկայացնում է պաշտպանության փոխնախարար Արտակ Զաքարյանը
Փաստաթղթի դեմ հանդես են գալիս մի քանի հարյուր ուսանողներ, ովքեր բողոքի ակցիաներ են անցկացնում: Իսկ այսօր նրանցից հինգն անժամկետ հացադուլ է հայտարարել: