Փորձագետ. Հարկ չկա մտավախություն ունենալ, որ Ռուսաստանը ղարաբաղյան հարցում կպնդի զիջումներն Ադրբեջանին
Արմինֆո.Հարկ չկա մտավախություն ունենալ, որ Ռուսաստանը ղարաբաղյան հարցում կպնդի զիջումներն Ադրբեջանին: Նոյեմբերի 23-ին մամուլի ասուլիսում այդ մասին հայտարարել է ԳԱԱ Արևելագիտության ինստիտուտի տնօրեն, պրոֆեսոր Ռուբեն Սաֆրաստյանը: Նրա համոզմամբ, Ռուսատանն, անշուշտ, ցանկանում է, որպեսզի Ադրբեջանն անդամակցի ԵԱՏՄ-ին, սակայն դա ոչ մի կերպ չի անդրադառնա Ղարաբաղի շուրջ բանակցային գործընթացի վրա:
Փորձագետը նշել է, որ, չնայած այն հանգամանքին, որ Ռուսաստանը ցանկանում է հզորացնել ԵԱՏՄ-ն, նա նաև հաշվի է առնում այն փաստը, որ Հայաստանն իր գլխավոր ռազմավարական գործընկերներից մեկն է: «Բանն այն է, որ Ռուսաստանը պայքարում է տարածաշրջանում իր ազդեցության հաստատման համար, և տվյալ դեպքում Մոսկվայի լավագույն դաշնակիցը Հայաստանն է: ՌԴ իշխանությունները շատ լավ հասկանում են, որ մենք իրենց հավատարիմ դաշնակիցն ենք, և ոչ մի կերպ չեն զոհաբերի Հայաստանի շահերը` ԵԱՏՄ-ին Ադրբեջանի անդամակցության հասնելու համար՚, - նշել է նա:
Սաֆրաստյանը նաև հայտարարել է, որ, չնայած Ռուսաստանի ցանկությանը, ինքը` Ադրբեջանը, բնավ չի ձգտում ԵԱՏՄ անդամակցության, քանի որ, ի տարբերություն Հայաստանի, ունի նավթ, ինչը ձգտում է շահավետ վաճառել, իսկ ԵԱՏՄ անդամակցության դեպքում դրա գինն զգալիորեն կնվազի կառույցի երկրներ արտահանելիս: «Այդպիսով, ադրբեջանական վերնախավը կարող է շարունակել խաղը Ռուսաստանի հետ, սակայն հազիվ թե համաձայնի անդամակցել այդ կառույցին՚, - հավաստիացրել է փորձագետը:
Ռուբեն Սաֆրաստյանը նաև անդրադարձել է Լավրովի այն հայտարարությանը, թե ղարաբաղյան հակամարտության կարգավորման համար ժամանակ կպահանջվի: Նրա համոզմամբ, Լավրովն այդպիսով ցանկանում էր հանգստացնել հայ հասարակայնությանը և ցույց տալ, որ ՌԴ դիրքորոշումը չի փոխվել:
Հիշեցնենք, որ նոյեմբերի 21-ին Երևանում Էդվարդ Նալբանդյանի հետ համատեղ մամուլի ասուլիսում ՌԴ արտգործնախարար Սերգեյ Լավրովը, անդրադառնալով ղարաբաղյան կարգավորմանը, մասնավորապես, հայտարարել էր. «Լուծումներն ամրագրված են բազմաթիվ փաստաթղթերում, որոնք 2007, 2009, 2011 թվականներից ի վեր պահվում են ԵԱՀԿ գլխավոր քարտուղարի մոտ, դրանով իսկ դրանք ամրագրված են որպես համանախագահների առաջարկություններ, դրանք բոլոը մնում են բանակցությկյունների սեղանին միագումար ձևով: Միակ բանը, որ ցանկանում եմ ևս մեկ անգամ ընդգծել, ինչպես ասել եմ Բաքվում, այդ բաղադրիչները ձևավորված են փաթեթում, և դժվար է վերցնել մեկը, երկուսը կամ երեքը և դրանց հիման վրա պայմանավորվել, քանի որ այդ դեպքում դուրս են մնում հաշվեկշռող բաղադրիչները, և չի լինի այն արդյունքը, որը մենք բոլորս ակնկալում ենք՚: Լավրովը նաև ընդգծել էր, որ խնդիրը բարդ է, և բանակցությունների ողջ փորձը վկայում է, որ դրանք արագ չեն ավարտվի: